UVCCM na kampeni Sambaza Bendera, kugusa kitasa cha Tanzania ya Viwanda

NUKTA ya kwanza ya dhamira ya nembo ya Jumuiya ya Vijana  wa Chama cha Mapinduzi (UVCCM)  ni kuleta matumaini pasipokuwa na matumaini hayo. 

Wakati nukta ya pili, nembo hiyo inawataka vijana hao kuhamasisha upendo pale penye chuki.

Kwamba thamani ya binadamu ni kujaliani, kuhurumiana, kusaidiana  katika hali zote. Vilevile  kushirikiana katika uzalishaji mali na kugawana pato la taifa kwa njia huru, haki na usawa kwa vile kila mtu anastahili heshima, kutambuliwa na kuthaminiwa utu wake.

UVCCM Wilaya ya Kinondoni  jijini Dar es Salaam umekuja na mpango wa Siasa ni Uchumi unaoakisi nukta ya tatu ya dhamira ya nembo hiyo inayowataka vijana kujenga taifa kwa kufanya kazi kwa bidii kwa njia ya vikundi vya kisiasa kwa msingi kwamba, kazi ndio msingi wa  heshima kwa binadamu yeyote mwenye nguvu na akili timamu.

Katibu wa Umoja huo Wilaya ya Kinondoni, Rashidi Semindu Pawa anasema mpango wa Siasa ni Uchumi unatekelezwa kupitia programu ya uwekaji wa bendera kwenye maeneo yote ya CCM wilayani humo sambamba na kufungua mashina mengi ya wakereketwa wa umoja huo kwa lengo la kusogeza huduma karibu na wanachama na jamii kwa ujumla.

Hiyo ni pamoja na kuanzisha shughuli za uzalishaji mali, biashara, kushiriki shughuli za kijamii na kitaifa za  kiserikali, chama kama ilivyoanishwa kwenye malengo ya kuanzishwa kwa Umoja wa Vijana wa CCM tangu wakati wa TANU Youth League (TYL) miaka ya 1950’s.

Anasema  mpango wa usimikaji wa bendera za CCM  umezinduliwa kwa mara ya kwanza katika historia ya UVCCM wilaya ya Kinondoni katika  tawi la Makongo Kati, Kata ya Makongo Oktoba 22 mwaka huu na kusema kuwa lengo ni kufika Kata zote 20 za CCM  Wilaya ya Kinondoni  huku akiupongeza uongozi wa tawi hilo kuwa wa kwanza katika ubunifu wa mpango hu.

“Tuna uasisi hapa Tawi la  Makongo, lakini tutahakikisha kwamba tunaupeleka kila kata na tawi kwa vile malengo yake yana tija kisiasa na kiuchumi…huu ni mpango muhimu kwa kundi la vijana ambao ni muhimu kufanya shughuli kwa vikundi au umoja hasa wakati huu taifa likiwahitaji kwa ajili ya kufikia malengo ya ilani yetu ya uchaguzi ya mwaka 2015 na sera ya CCM ya taifa la uchumi wa kati kwa njia ya viwanda kwa kufanya kazi,”anasema Semindu.

Katibu huyo wa UVCCM wa Wilaya ya Kindondoni anasema ili kufikia malengo hayo ni lazima vijana kujiunga kwenye mpango huo, ambapo kupitia shughuli za kisiasa na biashara ni rahisi kutambulika na kuwa wa kwanza kuingizwa kwenye mipango ya serikali hasa mikopo, kwa kuwa Mpango wa Serikali wa Uwezeshaji Wananchi Kiuchumi unalenga makundi yaliyoanzishwa na kusajiliwa badala ya mtu mmoja mmoja.

“Nawapongeza Tawi la Makongo Kati kwa kuanzisha programu hii muhimu, sasa naagiza Makatibu wote wa Matawi na Kata wa Umoja wa Vijana Wilaya ya Kinondoni  kuiga mfano huu, nasisi  Wilayani tunauchukua kuwa mpango wa Wilaya nzima,”alisema.

Anasema lengo kuu la mpango huo ni kuongeza idadi ya wanachama wa Umoja huo na CCM, kuimarisha, kuongeza imani na itikadi ya CCM ambazo shughuli hizo zinaweza kuwafanya na watu wengine wasiokuwa na itikadi hiyo kujiunga na wale walioingia na kufanya shughuli za kisiasa kwa mfumo wa kiuchumi.

Ili kufikia vijana kufikia malengo wanayoyaweka, amewaasa kuwa wavumilivu, msimamo hasa wa itikadi ya CCM  kwa vile ndiye yenye serikali ambayo inamiliki uchumi na fedha za uma na kuwa rahisi kwao kukopeshwa na sio vinginevyo.

Pia aliwaasa  kuzingatia nidhamu, uhusiano bora, kufanya kazi kwa bidii na kuwa watu wenye msimamo katika maisha yao yotea  na kusema mambo  hayo ni muhimu katika kumjengea heshima mtu mahali popote.

Suzan Godfrey Byemelwa ni Mwenyekiti wa Umoja huo Tawi la Makongo Kati, ambalo ni waasisi wa mpango wa kupandisha bendera chini ya kauli mbiu yao iitwayo `Kutafuta Kilichopotea, Siasa na Uchumi’  anasema madhumuni ya tawi lake kuja na mpango huo ni kuhamasisha kampeni ya kuongeza wanachama kupitia shughuli za ujasiriamali kwenye mashina na hatimaye kila kijana kushiriki kikamilifu katika kufanya kazi.

Pia inalenga kufanya shughuli zingine za uzalishaji mali kwa njia ya kilimo, ushonaji wa nguo, ufugaji ,  michezo na kushirikiana na watu katika jamii katika kuhamasisha utekelezwaji wa ilani ya CCM kwa vitendo hasa kwa kuanzisha viwanda vidogo vidogo vya uchakataji wa mazao ya kilimo na ufugaji kama muhogo na mazao ya samaki na mifugo.

“Tuna dhamira na suala hili la kutaka tufanye siasa kisayansi…utafiti wetu kwa kushirikiana  na viongozi wetu wakuu wa chama Tawini Chini ya Kamati Siasa ya Tawi tumebaini kwamba matumizi ya nguvu kazi ya vijana hapa nchini hayajakidhi matakwa ya Dira ya Maendeleo ya Taifa na Mpango wa Maendeleo ya Milenia (MDGs) katika kupunguza na kutokomeza umasikini kwa kutumia fursa zilizopo,”anasema.

Anasema kati ya vijana wa CCM 100 waliohojiwa kuhusu ushiriki wao katika Mkakati wa Kukuza Uchumi na Kuondoa Umasikini (MKUKUTA),  Mkurabita na Mkumbita, zaidi ya asilimia 60 hawafahamu mipango hiyo jambo ambalo ni rahisi kurubuniwa na kukosa msimamo kisiasa na kiuchumi.

Anasema ili kufikia malengo hayo umoja huo wao umjiwekea mpango kazi wa miaka mitano katika kipindi cha 2017 hadi 2022 kutafuta shamba nje ya Dar es Salaam na kushiriki katika shughuli za pamoja za kilimo ambazo zitazidi kuwaunganisha vijana na kufanya siasa inayoaminika kutokana na uhakika wa kipato kutokana na shughuli hizo.

“Kwa sasa tunayo biashara ya kuuza mkaa katika shina letu la wakereketwa namba 2, lakini malengo yetu sio kuendelea na biashara hii inayochochea uharibifu wa mazingira wakati katika mipango yetu ni kuwa na mradi wa bustani ya miti kibiashara kwa nia ya kupambana na madiliko ya tabia nchi kwa kupanda miti kwenye maeneo mbalimbali,”anasema.

Anasema baada ya kufanikiasha hatua hiyo, wanakusidiwa  kuwasilisha andiko la  mradi wa kilimo katika Benki ya Maendeleo ya Kilimo (TADB) na Benki ya Maendeleo ya Vijana ili ikiwezekana benki hizo zisaidie juhudi na  mtaji wao.

Katibu wa CCM Kata ya Makongo, John Makata anasema mpango wa usimikaji wa bendera ni jambo mtambuka kutokana na umuhimu wake kisiasa, kiuchumi na kijamii na kusema CCM katika Kata hiyo kinatoa baraka kwenye matawi  yote ya CCM kusaidiana na Jumuiya za Vijana katika kuutekeleza.

 Kamata anasema shughuli za kiuchumi ni muhimu katika kufanya siasa endelevu kutokana na tatizo la umasikini kuwa chanzo kikuu cha wanasiasa wenye hasa kundi la vijana kutokuwa na msimamo wa maisha na kiitikadi.

Pia ni lazima kutolewa kwa mafunzo endelevu ya shughuli za uzalishaji mali kwa njia ya ujasiriamali ili metholojia hizo ziweze kujengeka katika akili miongoni mwa vijana ili kuondokana na hali tegemezi, ombaomba na itikadi isiyoeleweka.

 “Tunapozungumzia suala la usaliti wakati mwingine husababisha na hali duni ya maisha, kama wanachama wetu hawatafundishwa mbinu za kujikwamua kiuchumi  na kuwezeshwa, ni wazi kwamba ni vigumu sana kutokomeza adui usaliti ndani ya chama chetu pasipo uwekezaji wa methodolojia za kisiasa hasa itikadi sahihi na shughuli za kiuchumi,”anasema.

Kwa mujibu wa Sensa ya Watu na Makazi ya Mwaka 2012  katika kila watu 10 wa Tanzania, wanne ni vijana  ambao umri wao ni kati ya miaka 15 na 35. Idadi ya kundi hilo ni asilimia 35 sawa na milioni 16. Mkoa wa Dar es Salaam una asilimia kubwa zaidi ya vijana huku Singida ikiwa na asilimia ndogo zaidi ya watu walio katika kundi hilo.

Pia asilimia 52.2 ya watu nchini wana umri wa kufanya kazi ambao ni kati ya miaka 15 na 64, huku ikielezwa kuwa rasilimali watu kwa ajili ya kuzalisha na kuongeza uchumi na kupunguza umasikini hapa nchini  si tatizo kinachotakiwa ni watu kutumia fursa zilizopo kufanya kazi kwa bidii ili kuinua uchumi.

 Alitaja mkoa unaoongoza kwa kuwa na watu wengi wa kufanya kazi ni  Dar es Salaam ambako kwa kila watu watatu, wawili wana umri wa kufanya kazi huku Simiyu  ikiwa na idadi ndogo ambayo ni asilimia 45.5.

Takwimu hizo zimebainisha kuwa idadi ya watu wenye umri wa miaka 60 na zaidi ambao ni wazee ni  milioni 2.5 sawa na asilimia 5.6 ambapo mkoa unaoongoza kwa kuwa na wazee wengi ukiwa Kilimanjaro ambao una asilimia 9.7 , Dar es Salaam ikiwa na wazee wachache sawa na asilimia 3.5.

JIUNGE NASI , BONYEZA HAPA http://www.raiatanzania.blogspot.com ku-install App ya raiatanzania,  bila ya kuingia website Tweet@Raia Tanzania online, youtube@Raia Tanzania online TV, Fb@Raia Tanzania online, insta@raia Tanzania online