Mbunge CCM awapasha polisi, wakuu wa mikoa

KATIKA siku za hivi karibuni kumekuwa na malalamiko juu ya utendaji wa Jeshi la Polisi, wakuu wa mikoa na wakuu wa wilaya kuhusiana na kutozingatia sheria na utaratibu katika utekelezaji wa majukumu yao.

Katika makala haya, Raia Tanzania limefanya mahojiano na Mbunge wa Kavuu (CCM), Dk. Pudenciana Kikwembe, ambaye pamoja na mambo mengine kuhusu jimbo lake, anaelezea changamoto zinazosababishwa na hali hiyo.

Raia Tanzania:  Umekuwa kwenye siasa kwa misimu mitatu hadi hivi sasa tangu ulipoingia bungeni mwaka 2005 ulipogombea ubunge wa viti maalumu katika mkoa wa Rukwa, je hali ya siasa kwa sasa unaionaje ukilinganisha na mwaka ambao ulianza kijihusisha na mambo haya?

Dk. Kikwembe:  Siwezi kusema moja kwa moja kuwa ni mbaya ama nzuri na uzuri wake au ubaya wake kwa sababu inataegemea imemgusa nani na kwa wakati gani.

Lakini naweza kusema kwamba kwa namna nyingine sio nzuri kutokana na mamlaka ambayo Jeshi la Polisi limepewa hivi sasa. Jeshi la Polisi lipo kwa ajili ya kulinda usalama wa raia na mali zao na kweli linatimiza wajibu wao kama inavyotakiwa, lakini huku kwenye mambo ya saisa elimu zaidi inahitajika wapewe.

Wananchi bado hawajapata elimu ya kutosha kuhusu masuala ya kisiasa, misingi ya kidemokrasia, mfano amri za wakuu wa mikoa, wakuu wa wilaya namna ambavyo wanavyotumia Jeshi la Polisi kuvunja amani ya wananchi.

Wakati mwingine amri zao zinaweza kusababisha hali ya uvunjifu wa amani ambayo tunayo Watanzania. Jeshi la polisi limekuwa likileta shida kwenye majimbo na  tatizo hilo linatokana na amri za wakuu wa mikoa na wilaya.

Mbunge anatangaza kuwa atakuwa na mkutano na wananchi jimboni kwakwe na hilo jambo halijakatazwa, kila Mbunge ameruhusiwa kufanya mkutano kwenye jimbo lake, lakini unakuta polisi wanafika pale na kuanza vurugu, wanasema hakuna mkusanyiko, sasa wananchi wanachanganyikiwa hawajui wamsikilize nani. Polisi wanatakiwa watumie kanuni na sheria zao kwa umakini, elimu kwanza itolewe kwa polisi ili waweze kufanya kazi vizuri na wanasiasa kuliko hivi sasa ambavyo wanafanya.

Pia kuwepo na ushirikiano kati ya Mbunge, mkuu wa mkoa na mkuu wa wilaya, kusiwepo na mikinzano kwamba huyo ametoa agizo hili na yule nae ametoa agizo hili, tufanye kazi kwa pamoja.

Raia Tanzania:  Hili la Jeshi la Polisi kuzuia mikutano ya hadhara unazani limewaathiri vipi kama wanasiasa?.

Dk. Kikwembe:  Mikutano ya hadhara sidhani kama imezuiliwa, ila ninachofahamu kilichozuiliwa ni maandamano ambayo hata mimi pia siyaungi mkono.

Wabunge tunafanya mikutano kwenye majimbo yetu na huu ni utaratibu mzuri na kikubwa hapa hakuna athari yoyote kwa sababu kama mbunge anafanya mkutano na wananchi wake huko ni kujijenga.

Tunapozungumzia kujijenga kisiasa sio lazima mfanye maandamano, ninamna  ambavyo tu wanasiasa wengine wanavyolichukulia jambo hili kana kwamba linatupoteza lakini  sio kweli, kikubwa ni watu wafuate sheria na kanuni ambazo zimewekwa.

 Raia Tanzania:  Unazungumziaje hali ya usalama kwa wabunge, kumekuwa na matukio kadhaa wabunge wana lalamika kuhusu usalama wao, je kwa upande wako ikoje?.

Dk. Kikwembe:  Jambo hili kwakweli limefanya kila mmoja amekuwa na hofu, kila mmoja anapigania uhai wake, usalama kwa wabunge umekuwa mdogo sana, ndio mana wabunge tumeomba kupewa ulinzi.

Hapo awali watu walikuwa salama, hakukuwa na matukio kama ambavyo tunaona hivi sasa.

Jambo hili limeleta mshangao kwa kila mmoja, jambo ambalo limefanya kila mmoja kuwa na hofu, wenyewe kwa wenyewe hivi sasa hatuaminiani kabisa, unakuwa ndani ya bunge ikifika muda wa kutoka unawaza kuvamiwa, kikubwa wabunge tujitahidi kuchukua tahadhari sisi wenyewe.

Raia Tanzania:  Unazungumziaje hili la wabunge kukamatwa hovyo.

Dk. Kikwembe:  Kinga ya mbunge ipo ndani ya bunge, lakini wakati mwingine mambo hayo ya kukamatwa yanatokana na matamko ambayo wanayatoa kwenye maeneo wanapokuwa.

Kama mbunge unaposimama kwenye jukwaa kuzungumza na wananchi wako lazima uangalie maneno ya kuzungumza, sio kila neno unatakiwa kulisema, wakati mwingine haya mambo lazima ifikie hatua tujitafakari mwenyewe kabla ya kuzungumza.

Unakuta mbunge anazungumza na vyombo vya habari ama mkutano  anatoa matamko makali hadi unajiuliza hivi huyu alikuwa na maana gani, kwanini anazungumza hivi, hata kama ni kutafuta umarufu sio kwa namna hii.

Raia Tanzania: Kumekuwa na malalamiko kutoka kwa wabunge wa vyama vya upinzani kuwa wabunge wa CCM mmekuwa mkipitisha vitu kwa masilahi ya chama na sio taifa, pengine hili likoje ikiwa wewe ni mbunge wa chama tawala?.

Dk. Kikwembe:  Tunapokuwa tunapitisha jambo lolote kwa pamoja ni kutokana na kuwa tayari lilishajadiliwa na kupitishwa kwenye kamati zetu za kibunge, ambapo huko tupo wabunge wa vyama vyote.

Lakini pia ieleweke kuwa CCM ndio kipo madarakani hivi sasa, hata wao ikija kutokea kuwa chama chao ndio kinaongoza nchini lazima wapitishe kwa ajili ya kuunga mkono chama chao.

Ila kinachotokea ni kwamba tunapokuwa bungeni tunataka kupitisha vitu kama bunge na sio kamati zinakuja changamoto za kiitikadi ya vyama.

Lakini pia wakati mwingine ipo miswaada ambayo inaletwa bungeni kwa ajili ya kupitishwa kama bunge kwa dharura na hapo kama bunge linatakiwa kufanya maamuzi ya haraka lakini sio kwamba  wabunge wa CCM tunafanya mambo kwa ajili ya chama .

Raia Tanzania: Kuna msemo ambao ni maarufu sana kwa wanasiasa ambapo pia umeambukizwa hadi kwa wananchi: “Tunaisoma namba” hii kauli ikoje?.

Dk. Kikwembe:  Kweli haya mambo yapo, kauli ya kuisoma namba ina maanisha maisha magumu, Rais wetu Dk. John Magufuli anataka wote tulingane kusiwe na matabaka ya wenye nacho na wasio nacho, lazima wote tuwe sawa.

Raia Tanzania: Tunaona upande wa pili wa wabunge wa upinzani wamekuwa wakilalamika kuwa wabunge wa CCM wanafanya mikutano bila kupata bugudha kutoka kwa Jeshi la Polisi lakini inapotokea kwa upinzani kamata kamata zinakuwa nyingi, ukiwa mbunge unayetokana na chama tawala unazungumziaje kauli hiyo?

Dk. Kikwembe: Hili jambo sio kwamba upinzani wanaonewa kukamatwa na polisi na wala sio wao peke yao ambao wanakamatwa, hii inatokana na kutokufuata utaratibu. 

Ukiangalia suala la kukamatwa sio wapinzani peke yao, hivi karibuni alikamatwa Mbunge wa Hanang Dk. Mary Nagu, huyu ni mbunge ambaye anatokana na CCM, kwahiyo hakuna ambaye anaonewa tuna rudi kulekule kuwa kila mmoja afuate sheria.

Raia Tanzania:  Nichangamoto zipi ambazo unakutana nazo katika jimbo lako?

Dk. Kikwembe:  Changamoto ni nyingi hususan za kimaendeleo, kama vile maji, umeme na barabara, hadi sasa nimepeleka visima 18 vya maji ambavyo vimeanza kuchimbwa.

Suala la madarasa na madawati wananchi wanachangia nashukuru kwamba wana mwitikio katika uchangiaji wa shughuli za maendeleo, nipo karibu na wananchi wangu katika kutatua changamoto zilizopo.

Katika kukabiliana na tatizo la maji na shukuru Rais Dk. Magufuli kuanzisha kampeni ya kumtua mama ndoo kichwani.

Lakini pia katika kampeni za uchaguzi aliahidi kila kijiji Sh. milioni 50, nitumie nafasi hii kuwaambia wananchi wangu kuwa fedha hizo zipo na kwa sasa serikali inaandaa utaratibu wa kuzileta fedha.

Raia Tanzania: Kwa uzoefu ulionao, unazungumziaje uelewa wa wananchi kwenye majimbo ambayo mnatoka, lakini pia wananchi wanaelewa nini kuhusu siasa?

Dk. Kikwembe:  Ninachokifahamu hadi sasa wananchi wengi wanatambua kuwa siasa ni uchaguzi, hata wanasiasa wengine ambao hawapo madarakani wanafahamu hivyo, ndio maana hivi sasa unaona wapo ambao wanapita kwenye majimbo kutafuta kura.

Ukiangalia hivi sasa majimboni kumeanza mchezo mchafu wa kwenda kutafuta kura kabla ya muda wake kufika, ninachofahamu ni kwamba watu wanapomaliza uchaguzi mkuu mbunge aliyechaguliwa anakuwa na kazi ya kuwatumikia wananchi wake ndani ya jimbo na nje ya jimbo kwa maana akiwa bungeni.

Lakini sasa kinachotokea ni kwamba mbunge akiwa bungeni huku nyumba kuna mtu anamvizia kuwa akitoka nitaenda kuzungumza na wananchi ili wamchague na ukizingatia wananchi wanafahamu kuwa siasa ni uchaguzi sio maendeleo.

Ukiwa kwenye majukumu ya kibunge unakuwa na hofu ya watu kwenda kufanya kampeni za kuomba kura chinichini, mambo haya yanatunyima amani, tunashindwa kusimamia hoja. akili yote inawaza jimboni kwako nani kaenda kuvuruga wananchi wako.

Kwa sasa wapo watu ambao wanapita kuomba kura, huu sio utaratibu mzuri , inafanya sasa mbunge ashindwe kukaa bungeni badala yake anaenda kupambana na watu wanaopita kwenye majimbo bila hata kampeni kuanza, naomba chama kiangalie majimbo ambayo yanavamiwa na watu.

Raia Tanzania: Kupitia mahojiano haya, unakipi cha kuwaeleza wananchi wako?

Dk.Kikwembe: Kikubwa niwaombe wananchi wangu, wapiga kura wangu wa Jimbo la Kavuu kuwa wajaribu kutambua sheria zilizopo kwenye halmashauri ili tuweze kusonga mbele.

Lakini pia niwahakikishie umeme unakuja muda sio mrefu, Rais Dk. Magufuli amekuwa akisisitiza kuwepo kwa umeme vijijini na mimi mbunge wao nipo katika kulisimamia hilo, kikubwa wajiandae na kuwa na matumizi mazuri hususan kulinda miundombinu.

Kama mbunge wao  nipo katika harakati za kuhakikisha changamoto sugu zilizopo katika jimbo ninazifanyia kazi.

JIUNGE NASI , BONYEZA HAPA http://www.raiatanzania.blogspot.com ku-install App ya raiatanzania,  bila ya kuingia website Tweet@Raia Tanzania online, youtube@Raia Tanzania online TV, Fb@Raia Tanzania online, insta@raia Tanzania online