Asilimia 67 ya uvimbe bila maumivu ni dalili za saratani

TAFITI zinaeleza kuwa zipo baadhi ya dalili zinazojitokeza katika mwili wa binadamu ambazo katika hali isiyo ya kawaida ni ishara kuwa mwili huo una shida na unahitaji uchunguzi kugundua ni tatizo la aina gani. 

Baadhi ya dalili hizo zilizoelezwa na tafiti hasa kwa watoto wadogo zinazoashiria kupatwa na ugonjwa wa saratani ni kuvimba sehemu ya mwili bila maumivu yoyote  hasa sehemu za  shingo, miguu, shavu na tumboni.

Akizungumza na Raia Tanzania mapema wiki hii, Katibu wa Shirikisho la Vyama  vya Waganga wa Tiba Asili na Tiba Mbadala (SHIVYATIATA),  lenye makao yake Tabaa Relini Jijini Dar es Salaam Dk. Othuman Shem alisema baadhi ya dalili katika mwili wa binadamu  ni ishara ya ugonjwa wa saratani ingawa kundi kubwa la watu halina ufahamu huo.

Dk. Shem ambaye pia ni Mkurugenzi Mtendaji wa kituo cha dawa za asili cha  Paseko Natural Clinic  alisema  utafiti uliofanywa na kampuni ya Paseko T.O & P. Co. Ltd  kwa kushirikiana na Ubalozi wa Ireland  hapa nchini,  ulionesha kuwapo kwa kundi kubwa la watu katika hamii hasa watoto kuwa na dalili hizo bila kujua kuwa ni dalili za saratani hasa watoto.

Picha ya mtoto mwenye uvimbe.

 “Katika hatua ya kuangalia dalili hizo kwa kushirikiana na ubalozi wa Ireland hapa nchini, tumegundua kuwa zaidi ya asilimia 67 ya dalili hizi inaonesha kuwa huu ni ugonjwa wa saratani lakini wengi  hawajui.”alisema Dk. Shem.

Aliendelea kusema kuwa,d alili zingine ni pamoja na mtoto  wa jicho kuwa na rangi nyekundu, makengeza na hata upofu wa ghafla.

“Pia damu kutoka kwenye fizi, kuvia katika macho, kutapika wakati wa asubuhi, kuumwa na  kichwa kupitiliza, kukonda bila sababu, kupungua uzito, homa inayojirudia rudia bila kuwa na chanzo, nguvu ya mwili kupungua kuliko kawaida” alisema. Othuman.

Zaidi ya dalili hizo, nyingine ni  mtoto  kupungua damu mwilini mara kwa mara, alisema na kuongeza: “Tunaendelea kufanya tafiti zaidi ili kuweza kuokoa  Watanzania, hii ni pamoja na kutoa elimu hasa vijijini ambako wengi wanakuwa na dalili hizi lakini hawazijui na kujikuta wakipoteza maisha ama watoto au wapendwa wao,”aliongeza.

Kwa muktadha huo, alisema kampuni  hiyo  imeamua kujitolea  kwa kushirikiana na mamlaka zingine kupima bure watoto wenye  dalili hizo nchini kote na kusema kuwa milango iko wazi kwa Mtanzania mwenye hitaji