Mufti Tanzania, Zanzibar kupamba Kongamano la Misk ya Roho

MUFTI  wa Tanzania Sheikh Abubakar Zubeir pamoja na Mufti wa Zanzibar Sheikh Saleh Omar Kaabi, ni miongoni mwa wageni mashuhuri watakaohudhuria kwenye kongamano kubwa la Kida’awa la Afrika Mashariki lijulikanalo kama ‘Misk ya Roho.

Kongamano hilo ambalo ni la kwanza na la aina yake, limepangwa kufanyika Jumapili ya Novemba 26 mwaka huu katika ukumbi wa Diamond Jubilee jijini Dar es Salaam.

Taj Mohammed Abbas, Mkurugenzi wa makongamano wa Taasisi ya The Islamic Foundation (TIF), ambayo ndiyo inaandaa kongamano hilo amesema, pamoja na mambo mengine, Mufti Zubeir na Mufti Kaabi watawasilisha mada kwenye kongamano hilo.

Mufti, Sheikh Zubeir

Sheikh Abubakar Zubeir ni Mufti wa tatu na alichaguliwa mwaka 2015 baada ya kifo cha mtangulizi wake Sheikh Shaaban Simba, ambaye alipokea kijiti cha wadhifa huo kutoka kwa Muftiwa kwanza wa Tanzania, Sheikh Hemed bin Jumaa bin Hemed.

Mufti Zuberi ni mzaliwa wa Tanga na kwa muda wa miaka 22 iliyopita, kabla ya kuwa Mufti, amekuwa kiongozi na kushikilia nyadhifa mbalimbali ikiwamo pamoja na Naibu Mufti wa Tanzania na Mjumbe wa Baraza la Ulamaa.

Nafasi nyingine ambazo Sheikh Zubeir aliwahi kuzihudumu ni pamoja na Msaidizi wa Mufti wa kwanza wa Tanzania, Sheikh Hemed bin Jumaa bin Hemed kuanzia mwaka 1984 hadi 2002, Naibu Kadhi Mkuu wa Tanzania, na Mwenyekiti wa Halmashauri Kuu ya Taifa  ya BAKWATA.

Mufti, Sheikh Kaabi

Sheikh Saleh Omar Kaabi aliteuliwa kuwa Mufti wa Zanzibar na Rais wa Zanzibar, Dkt. Ali Mohammed Shein tangu mwaka 2011 baada ya kifo cha mtangulizi wake Sheikh Harith bin Khelef.

Mbali na kuwa Mufti, kwa sasa Sheikh Kaabi ni kiongozi katika Baraza la Maulamaa wa Zanzibar, ambalo kwa mujibu wa Katiba ya Zanzibar lina uwezo wa kutoa maamuzi juu ya masuala mbalimbali ya dini ya Kiislamu visiwani humo.

Sheikh AbdulQadir al-Ahdal

Mbali na viongozi hao wakuu wa dini ya Kiislamu hapa nchini, pia kongamano hilo litahudhuriwa na Rais wa taasisi ya Al-hikma Foundation, Sheikh AbdulQadir bin Muhammad Ahmad al-Ahdal ambayo inamiliki shule kadhaa za ngazi za awali, msingi na sekondari.

Sheikh AbdulQadir ambaye kwa sasa ni raia wa Tanzania, kabla ya kuja nchini, mnamo mwaka 1992 alianzisha Madrasa za kusoma na kuhifadhi Qur’ an katika Mkoa wa Hadharamout nchini Yemen chini ya usimamizi wa mwalimu wake Sheikh Ahmad Hassan al-Mualim.

Pia, Sheikh AbdulQadir ni Mwanazuoni anayejishughulisha na tafiti za Kifiqh, na wakati huo huo ni Mjumbe wa Kamati ya Fatwa katika Umoja wa Wanazuoni wa Kiislamu hapa nchini (Hay-at).

Kando na hayo, Taasisi ya Alhikma Foundation ambayo Sheikh AbdulQadir ndiye Rais wake, imekuwa ikiandaa na kusimamia mashindano makubwa ya kusoma na kuhifadhi Qur’an hapa nchini kwa kushirikisha nchi za Afrika Mashariki na Kati.

Aidha,taasisi anayoiongoza ya Alhikma Foundation hutoa huduma za kijamii kama vile kuchimba visima nk.

Mtoto aliyemlingania Kenyatta

Mgeni mwingine ambaye anatarajiwa kuvuta hisia za Waislamu wengi katika kongamano hilo, ni mtotoOmar Mohammed kutoka nchini Kenya.

Omar ambaye kwa sasa ana umri wa miaka 6, aliwahi kukutana na Rais wa Kenya Uhuru Kenyatta katika Ikulu ya Mombasa ambapo alitumia fursa hiyo kumlingania ili awe Muislamu.

Baadhi ya wasomi na wachambuzi wa masuala ya dini ya Kiislamu hapa nchini wanamuelezea Omar kama mtoto jasiri, mwerevu na mwenye fikra pana kutokana na uthubutu wake wa kumshawishi kiongozi wa ngazi ya juu katika nchi kujiunga na Uislamu.

Masheikh wengine watakaohudhuria kwenye kongamano hilo ni Sheikh Salim Barahiyan kutoka Tanzania, Sheikh Juma Amir kutoka nchini Kenya,Sheikh Ibrahim Kyebanja kutoka Uganda na Sheikh Zuberi Bizimana kutoka Rwanda.

Wengine ni Sheikh Jamal Maboyi (Burundi), Sheikh Muhammad Issa (Tanzania), Sheikh Yusuf Abdi (Kenya) na Sheikh Nurdin Kishki kutoka Tanzania.

Katika hatua nyingine, Mkurugenzi wa Makongamano ya TIF, TajMohammed Abbas aliwashajiisha Waislamu kuhudhuria kwa wingi kwenye kongamano hilo ili kujifunza mambo muhimu ya dini yao ikiwa ni pamoja na umuhimu wa kutunza amani.

Mada zitakazowasilishwa

“Mada kama vile Ikhlas, umuhimu wa elimu na thamani ya amani japo sio maudhui mpya kuzungumzwa au hata kuandikwa, lakini zina umuhimu mkubwa hususan kwa Waislamu wa zama hizi. Tunaamini kupitia kongamano hili Masheikh watazidadavua kwa namna yao na kwa misingi inayokubalika kwa faida ya Waislamu na jamii kwa ujumla,” alisema TajMohammed.

TajMohammed alifafanua kuwa, amani, utulivu na umoja ni mambo yanayojenga mustakabali na hadhi ya mwanadamu kuanzia katika maisha binafsi na mbele ya jamii nyingine, hivyo lazima amani itunzwe na ienziwe ili idumu katika uasili wake.

TajMohammed aliongeza:“Kuwepo jamii ya mwanadamu ni jambo la msingi na la umuhimu mno, kwa kuwa binadamu ni mwanajamii katika maumbile yake, anazaliwa katika jamii, anaishi na kufia humo,”.

Tiketi

Aidha TajMohammed aliwakumbusha Waislamu kuendelea kujisajili kwa ajili ya kongamano hilo kwa kununua tiketi kwa shilingi 5,000 kupitia namba 0787 565777, 0773 565777, 0718 000433 na 0742 877775 na kwamba kiasi hicho kitajumuisha huduma ya chakula pamoja na vinywaji.

Alivitaja vituo vya kununulia tiketi hizo kuwa ni pamoja na Discount Center- iliyopo Mlimani City na katika mtaa wa Uhuru, Gem Point iliyopo mtaa wa Indira Gandhi, Baby Shop iliyopo GSM Mall Msasani, Kanzu Point iliyopo City Mall na Taste Me iliyopo Dar Free Market.

Sehemu nyingine ni GGS Bolts & Nuts iliyopo mtaa wa Livinstone Kariakoo, Her Finess iliyopo Barabara ya Umoja wa Mataifa, Dayun Shop iliyopo Puma Fuel Station Tabata, Babyz World Tanzania iliyopo mkabala na kituo cha polisi Msimbazi na Peace Travel iliyopo Mtaa wa Manyema Kariakoo.